بوند.. جيمس بوند.. يبي يصور فيلمه الجديد في الـ بيتنا!

بوند.. جيمس بوند.. يبي يصور فيلمه الجديد في الـ بيتنا!

هذه التدوينة في قسم: موليكيلو يسولف April 2nd, 2008

من فترة طويلة جتني رسالة من طاقم تصوير فيلم جيمس بوند الجديد.. و الظاهر انهم.. يبون يصورون فيلمهم الجديد في الـ بيتنا!
شكلهم ناويين يخربون الفيلم! :mrgreen:

و أكيد ان الفيلم يبي يصير مستواه غير طبيعي دامه بيتصور على مسافة قريبة من خشيشتي.. لأني اتمتع بحس ابداعي مبهر ممكن يأثر على كل المتواجدين حولي في دائرة نصف قطرها 4 أمتار (بيشوتون فاول غير مباشر شكلهم موب مصورين فيلم :mrgreen: )..

هذا نص رسالتهم هاللي ما يستحون.. (اللحين وراي قلبت عليهم؟ :mrgreen: )
بس تراي مسحت أي شي ممكن يدل على مكان الـ بيتنا ولا على اسمي.. خبركم الاحتياط واجب.. و الخصوصية مطلوبة.. و سامي اعتزل..
الأخيرة ما ادري وش سنعها.. لكن عموما.. هذي رسالتهم..

طبعا مثل ما لاحظتوا يبون يسوون مشهد امطار و بربسه.. و يبون يحوسون اللوبي حقنا.. لكن قسما بالله لو ما يشطفون عقب ما يضفون عفوشهم ان اخلي اذاني و اذانهم اربع (وش عند الشكش؟ :mrgreen: )..
و عاد انا من وصلتني الرسالة و انا اتساءل..
اللحين هل يا كيف ربما يا ترى.. وشلون يبي يسوون مشهد المطر؟
شكلهم شغل مسلسلات مصريه.. هوز مويه و يرعصونه من قدام.. ترى نفهم حنا بأمور الخدع السينيـ(ـمائية).. ياما رطشت أخوي (خالد) منول بالحوش..

و طبعا حركات (ابراهيم الفريان) تبي تطلع.. قسما بالله لأنشب لهم و اصور معاهم كل ابوهم.. و امحط لكم الصور.. اويلاو بس.. يصورون بالـ بيتنا ببلاش.. معصي..
عاد المشكلة اللي يمثل افلام جيمس بوند من تالي ما اواديه.. احس اني ابصارحه لامني شفته.. أبقول له يا أخي سبحان الله عجزت ابلعك.. ظنكم وش بيرد؟ :mrgreen:

و صراحه عرفوا يختارون التوقيت المناسب..
ولا واحد من اهلي موجود.. شكلهم يحترونها من الله..
لأن لو الوالده – الله يطول بعمرها - فيه.. كان ازعجتهم تقول وشلون تبللون نفسكم بهالبرد.. و وزعت عليهم مناشف! :mrgreen:
ولو الوالد – الله يطول عمره - فيه.. تسان موسنهم بالعقال تموسن! :mrgreen:
ولو خالد فيه.. كان انواع التميلح معهم عشان يصورهم و يحط الصور بالفيس بوك و يتميلح.. :mrgreen:
أما خواتي عاد.. حكاية تانيه خالص.. والله يا عندي اختين (طليعه و لماسه).. كان يعزمون كل صديقاتهم يجون يشوفون التصوير.. خصوصا صديقتهم نورة.. يا كثرها! :mrgreen:

المهم.. اللي يبي توقيع ولا شي يعلمن.. ترى ابصير صديقهم.. و بالنهاية كلنا زملاء.. هم ساهموا بالقروش و التمثيل و اللزي منه.. و انا ساهمت بالـ بيتنا.. و كله في سبيل في انتاج هالفيلم اللي ان شاء الله يحوز على اعجابكم.. حنا اجتهدنا و الباقي على الله..

________________________________

- قفلة:
!I still miss some one

Audio clip: Adobe Flash Player (version 9 or above) is required to play this audio clip. Download the latest version here.

_______________________________



  

Responses to “بوند.. جيمس بوند.. يبي يصور فيلمه الجديد في الـ بيتنا!”

  1. sweetheart
  2. khaled
  3. Reem
  4. tofe
  5. sahab
  6. TALAL
  7. haffoo
  8. Alanoud
  9. SuPer Woman
  10. moOoOoly
  11. ANGNTRA omar
  12. Abo_5Aleel

ورى ما تسدح تعليق؟ .. ترى ببلاش..

معليش يا عزتي لك.. لازم تسجل دخولك عشان يمديك تسدح تعليقات.