اذكرهم.. يذكروني؟
اليوم كان يوم سعيد في حياتي.. ما فيه شي جديد.. لكن كنت سعيد اليوم..
لقاء أكاديمي ناجح في الصباح.. تمرين و كورة في العصر.. و اجتماع مع الاصدقاء و الاتفاق على مشروع عمل مشترك في الليل.. و هواجيس بيني و بيني و معنا الغيتار قبل شوي..
.
السعادة اللي عشتها اليوم.. اهتزت و انا اسولف مع نفسي قبل شوي.. و السبب هو أفكار أعتقد أنها جالت في خواطر الكل بشكل أو بآخر..
.
الانسان يتعرف على أشخاص كثير في حياته.. ألوف البشر.. أهل و أقارب و أصدقاء و زملاء.. و القليل منهم اللي يترك بصمة داخله.. قليل منهم اللي يحجز لنفسه مكان لا يمحى في الذاكره..
لكن لما نتذكر هالناس اللي كانوا حوالينا و لنا معهم ذكريات صعب ننساها.. ننصدم ان كثير منهم راح!
ببساطه راح..!
اختفوا من حياتنا.. غابوا.. و ظروف الغياب كثيرة.. منها اللي كنا نقدر نمنعها.. و منها اللي ما كان لنا قدرة على تلافيها..
.
الحياة بهمومها و تعقيداتها و مشاغلها.. تخطفنا من بعض..
تمر سنين.. ما نتلاقى ولا حتى نكلم بعض!
لما اذكرهم.. و تمر طيوفهم حولي.. ابتسم.. و اتمنى لهم الخير..
لكن.. و لأن الانسان جُبـِل على الفضول و حب الذات.. سرعان ما اسأل نفسي.. يا ترى..
هل هم يذكروني مثل ما اذكرهم؟
جواب هالسؤال.. يمكن ما يغير في الواقع اللي أعيشه شي.. لكن اعتقد انه لو كان ايجابي.. بيغير اشياء كثير داخلي!
يمكن لأني لو عرفت انهم مازالو يذكروني بالخير.. ابعرف اني كنت مصدر سعادة في حياتهم.. و هالشي مريح و يرضي الذات..
الشاعرة الأمريكية Maya Angelou تقول:
I’ve learned that people will forget what you said, people will forget what you did, but people will never forget how you made them feel
يمكن كلامي فوق فيه بعض المنطق.. لكن الغريب.. و الغير منطقي.. انك تتمنى لو بعض الاشخاص يذكرونك.. حتى لو ما ذكروك بالخير!
يقول الشاعر الأموي عبدالله بن الدمينه:
لئن ساءني أن نلتني بـِمساءةٍ …. قد سرني أنّي خطرتُ ببالك
ضعف؟
يمكن.. و من فينا ماهو ضعيف؟
القوة المطلقة ليست من صفات البشر.. هي من صفات الرب.. هو القوي الذي لا يشوب قوته ضعف..
البشر حتى في خيالاتهم و أساطيرهم..
ما قدروا يستوعبون ان القوة المطلقة ممكن تكون في كيان واحد..
قدماء الاغريق.. جعلوا لـ إلـه القوة Kratos.. ثلاثة أبناء:
Nike إلـه النصر.. Bia إلـه الإجبار.. و Zelos إلـه الخصومة و التنافس..
من فينا ماهو ضعيف؟
.
لو رسمنا ملامح القوة على وجيهنا.. ترى عشان نداري ضعفنا.. كلنا بشر!
كلنا نحب نسمع حبايبنا.. لأنها تعبر عننا.. كلنا!
أغنية I will remember you لـ Sarah McLachlan.. وضعتها على هرم الأغنية الغربية لفترة طويلة.. لأنها تعبر عننا.. كلنا!
Audio clip: Adobe Flash Player (version 9 or above) is required to play this audio clip. Download the latest version here.
.
أنا ابذكرهم.. رغم كل السنين اللي مضت.. و اتمنى لهم الخير..
ذكروني.. نسوني.. أنا ابذكرهم.. لأني ببساطه.. ما أقدر أنساهم!
Audio clip: Adobe Flash Player (version 9 or above) is required to play this audio clip. Download the latest version here.
.
انا اللحين أبروح آكل بسكوت شاي.. و اغير وتر الـ La في غيتاري.. لأنه شوي و ينقطع.. حوم تسبدي دايم هو أسرع وتر يرقل.. يمكن لأني لازم أمر عليه في كل معزوفة!
.
اليوم انا سهران.. يمكن ارجع اشخمط عليكم عقب شوي..
على طاري الـه النصر Nike.. الظاهر يبـ ينهبلون فلاسفة الإغريق لو دوروا انه صار جزمة نلبسها اللحين.. مثل الصورة اللي فوق! 
بس يا مصلي و انا رومنسيكي.. ولا؟
شوكرن.. 
_______________________________
Responses to “اذكرهم.. يذكروني؟”
ورى ما تسدح تعليق؟ .. ترى ببلاش..
معليش يا عزتي لك.. لازم تسجل دخولك عشان يمديك تسدح تعليقات.
كن صديقي فيذاك..
كلمة الأسبوع
الـصـيـف
إجازة ممتعة للجميع.. إجازة الصيف هي من أجمل مراحل العام حيث نرتاح قليلا بعد وتيرة دراسة أو عمل متسارعة.. نسافر و نتعرف على أماكن جديدة.. و نلتقي بالأهل و الأصحاب في الأماكن البعيدة.. المداومين في الصيف.. على الأقل بتخف عليكم الزحمة في الطريق.. انبسطوا بعد!
Loading ...
صباح الخير مولي
بس بقول لك كلمة
” أكيد اللي يعرفك مستحيل ينساك ، صدقني معرفتك مكسب للجميع من جميع النواحي ”
بس أتمنى يحافظون على هالجولريز اللي عندهم
ومابعرف الرومانسية حالة شائعة هاليومين
آنجوي يور دي
مولي صح ماقلت لك
اليوم كنت أفكر وأقول بخاطري من زمان ماشفنا تصميم لمولي
بس ماني متذكرة متى
شكلك أعطيت عين ألكترونية لذاكرتي
ما أقول إلا ماشاء الله عليك
الشاعرة الأمريكية Maya Angelou تقول:
I’ve learned that people will forget what you said, people will forget what you did, but people will never forget how you made them feel
(Feel) << صح لسانه
اول شي جعلك دآآآآآآآآآآآآآيم مبسووط ومسفهل ولا تهتز سعادتك يا خيي
قل آآمين
اذا على الناس اللي عرفناهم واااااوتش .. عاد انا اجتماعيه مره احس اللي اعرفهم كثااار ماشاء الله
ولكن .. << مسكت جد
كلن له غلاته الخاصه على كثرهم ..
بس هذا الشي :
لئن ساءني أن نلتني بـِمساءةٍ …. قد سرني أنّي خطرتُ ببالك
شي صدز صدز صار الحين
اتمناه صادزه والله
عاد الحين اعوذ بالله صرنا نبعد عن بعض غصب ..
يعني ما يمر الوقت الا تفطن فجأه ذا ما تعرف اخباره .. ذا شره عليك وراك ما تسأل عنه.. بس غصب!!ّ
مولي لي ساعه اعصر عمري بصير رومنصيه ماش الحساسات مفصله وانا خييتك !
كلامك من جد خوقاقي .. خصوصا انه شي كلن يفكر به الحين لان الدنيا كثرت مشاغله وما عاد الواحد يحرص يسأل عن اللي ما يسأل عنه
.. يعني اسأل عني اسأل عنك
ابعد بلهى عنك !
ذا عن البعض موب انا طبعا <<< حسنة المعشر والعشره
يا ترى انا حجزي مؤكد والا كنسلتووه بذاكرتك !!<< برا
الله يحلل كل من بعدنا عنه غصبن عننا او برضانا .. ويحللنا منهم ..
واكيد بما اني حليله فأنا اذكرهم بخير
لاني لمن اتعلق بحد اعجز انساه !! البته ..
ان شاء الله اكون من اللي بيشملهم هذا الكلام ( بدون غياب ) وبدون ( حتى لو ما ذكروك بالخير ) .. << تتعب بذرابتي
على سالفة الغياب .. خالد مبطي عنه .. عساه بخير بس .. قله يسيير عشان اعلمه وش نوع التحشيش كوده يجيبه لانه قضى
والاغاني مدري وش اخلي ووش اقول عنهن .. اخترت اللي بالصميم .. وه بس هالااغاني لحالهن ذكريات
جب لي حبة بسكوت الشاي لا جيت
ويا صبااااح الروقان .. اليوم باين رااايق ماشاء الله .. قط اعديتك !!
ايه تعال شخمط مثل ما انت سهران .. تراي مصبحه
:roll:
:cry:
يسعد صباحكم
تمر مثل هالافكار دايم مولي بس ماادقق فيها ..
اتوقع ان شخص كان له بصمه واضحه بذاكرتي سواء كويسه او لا راح يكون لي مكان بذاكرته.. طبعا اقصد الاصدقاء ومن هم في هالمنزله واللي جمعت بينا ظروفنا المتشابهه مثل دراسه او عمل او غيرها…او لقاءات كثيره في مكان ما نرتاده..
لكن من ناحيه ثانيه ممكن اتذكر معلمه بكل خير او العكس وانا كنت وقتها طالبه …وهي طبيعي انها ناسيتني بالمره الا اذا كان فيه شي مميزني عندها لان اوضاعنا تختلف كلياا وقتها.. وهي بتتذكر مين والا مين!؟..بسبب كثر اللي يمرون عليها وتشابه المواقف
:
“الغير منطقي.. انك تتمنى لو بعض الاشخاص يذكرونك.. حتى لو ما ذكروك بالخير!”
انا مااتمنى هالشي ابدا ومااتوقع فيه احد يسره انهم يذكرونه بسوء
..يااااااارب ينسوني هههههه
:
اجل NIKE طلعت آلهة النصر عند الاغريق!!..معلومه حلوووووه
ياكثر التفسيرات اللي يطلعونها ربعنا على اسامي البراندز وعلاماتهاااا..اذكر اني قريت مره تحذير عنها :?
وبالعافيه بسكوت الشاي
لكن انت بالذات يامولي اتوقع اللي صادفك مره وحده بيتذكرك دايم :D وكلك ملح وانت رومنسيكي خذ راحتك
كلامك منطقي جدا ويوجع
صحيح مايبقى بذاكرتك الا الي له بصمه او ذكرى غاليه
بس الله يهداك احد يتمنى احد يذكره بالشر
والتصميم رائع
واوافق الي فوقي مااظن من عرفك ينساك انت سبيشل
:”(
تذكرت الاشخاص الي فرقت بينا الدراسة والجامعة والحياة
بس الدنيا صغيرة
واكيد نتلاقى بالصدفة
وتذكرت الناس الي غلطت عليهم وابي اعتذر لهم :$
وشوقرن
لكن كنت سعيد اليوم..
<< يعني انت سعيد
مولي
كلامك في الصميم ..
بتفلسف شوي
احيان يمر عليك انسان وانت ماودك تعرفه كارهـ تحسه انسان بغيض ومع الوقت والعشرة يصير من اقرب احبابك ويمكن من اعزهم ..
وفجأة تنقطع اخبارهـ عنك من غير مقدمات ولا سبب حتى انك تصير في حيرة من امرك
واذا شافك هو اللي يتشره عليك مع ان الحق لك
..
شفني انا توني ببدايه حياتي هع
وياكثرهم اللي اعرفهم وغير كذا يطالبون بحقوق دوليه
يعني لو تقدمت اكثر كم بيصير عندي من معارف واصدقاء ,,
تصدق كرهت اروح اماكن عامه لأنه مستحيل اطلع الى وانا ماسكه بيدي صديقه جديدة .. وهات يابحر << مدري وش تبي خاشاه عرض
ياخي فراق الحبايب شيء يعور القلب ,, << تبسي
احيان يكونون معك بس بقلبهم بعيدين ,,
يعني اجساد بلا ارواح ,,
..
ومن ناحية انهم يذكروني خلق الله ,, شيء حلو وطيب انهم يذكرونك ويدعونلك ,,
موب ماتدري الا رساله ناطه بجوالك تتشره..! ليه لانه ذكرك ..
<< الله يصلحهم ذا الناس بس وهـ 
..
يعني ثقافتك انقليزيه
يومنك رايح تستدل بمقوله شاعرة امريكيه .. ونحن اصحاب ا لشعر
وينك عن المتنبي وابو دلامه وابو العباس << لاعمرك تحتسين تكفين
..
مولي احسك انسان حبوب <<
وين اللي بيغني بالعربي هاه..! << يالليل البعارين
..
طولت هرج .. وش اسويبك رومنسيتك خلت قلبي ينزف مير لا تتعودها مرتن ثانيه انت وهالرومنصيه ..
..
مولي ,, خذ (ورده )
8
8
8
8
قطوه ..!
انتي لين الحين تحسين
الحين كل هالحبابه وتقولين احس !! عيب عليتس اسحبيه وانا اخيتس وقولي اجزم بعدي انتي
الله يهديتس بس ( وجه متحلطم )
واثر به احد اشد مني ببطىء وصول حساسات الشسمه << قطوه مداعبه ترا !
حبي لتس بس ..
ولو انتس صادزه على انتس ما تدخلين مكان الا وتطلعين بصديقه ..
كان انا صديقتس يا خييتي
هه دوتس ايدي /..\
لا موب ذي اليمنى لان ذي به حبر بصبعي
@ << ترا ذي بصمه اصبعي
على انك بك حبابه وحلاله وذرابه وارثه من خييتك المصون ( أنا )..و و و منيب قايله شي الحين عاد تكبر دميجتك يالله هناك
بس لا تحاول منتب احلل مني << كف رفسه على برا !
مساء السعاده ،، مولي
اليوم نفس وضعك جداً سعيد ، صديق عزيز علي حصل على شهاده الـ MBA من احد ارقى جامعات بريطانيا ( ما شاء الله ) وفرحتي فيه جداً كبيره ، لذلك اكتفي اليوم بالسعاده ، لكن فعلاً احيان تمر عليك وتتذكر اشخاص مروا في حياتك وتتمنى تجمعكم الايام خاصه اصدقاء الطفوله … ورد عن الرسول – صلى الله عليه وسلم – ما معناه ( إذا تذكرت أخيك فادعوا له )
عمر الله قلوبنا بالطاعه
تحياتي
هلا و غلا سويت هارت.. صباح الخيرات..
.
الله يسلمك يا الغالية.. ممنون ذوقك و كرم أخلاقك..
انا ما تفرق معي واجد اذا نساني شخص انا ناسيه.. لو كان يهمني ما نسيته أصلا..
لكن فيه ناس كان لهم ومضات مشرقة في الماضي.. صعب اقدر انساهم..
.
نورتي المكان..
هلا و غلا نانو..
أما feel!.. الله الله..
آمين.. و يا عساك دوم مبسوطه و مروقه..
.
حجزك OK درجة رجال أعمال.. الأولى full يا بيّي..!
انتي و لا يهونون كل الاعضاء هنا.. من مكاسب هالمدونة.. يا أوخيتي..
.
خالد يا حبني له حايس بأمور الدراسة و الترتيبات.. و فيزته ما طلعت و مبتلش.. الله يعينه..
عاد هالمليعين.. يحتري يعطونه السفارة ورقة الفحص الطبي.. موب عشان يطلع الفيزا بسرعه..
لااااع.. عشان شي ثاني خالص مالص.. ولا أبو خلود؟
.
عاد والله يا عندي لك بسكوت شاي.. مادورو 5.. شي ثاني صراحه!
معليش أمس لهيت عن المدونة شوي..
نورتي المكان..
هلا والله picky..
يسعد لي صباحك يا الغالية..
.
ممنون كلامك الحلو يا أوخيتي.. هذا من طيب أصلك..
.
والله انا بالعادة ما أدقق ابد.. لكن مدري وش جاني امس.. حسيت اني رومانسيكي..
عاد ترى هالحالة تجيني مره كل 5 سنوات.. يعني امس هو يوم يسجل في التاريخ بماء غريب..
.
على طاري تفسيرات البراند نيمز.. تدرين وش معنى تفسيرهم لـ GAP؟
.
الله يعافيك يا رب و نورتي المكان..
هلا و الله CAT..
يسلم راسك طال عمرك.. هذا من طيب أصلك يا الغالية..
.
سعيد جدا ان التصميم أعجبك..
نورتي المكان..
هلا و غلا rainyshore..
الله يجمعك بكل من يعز عليك يا الغالية..
نورتي المكان..
هلا و غلا قطوة..
يا ملح فلسفتك و قصم..
كلامك مره أعجبني خصوصا حكاية اللي يتشره عليك لأنه ذكرك!
.
القصائد الغربيه ترى في أحيان كثيرة تكون أقرب للذات من كثير من القصائد العربية..
و لو ان الشعر العربي كان و سيبقى هو الأفضل في رأيي..
.
أبغني بالعربي.. عند وعدي والله.. لكن وراسك ما حصلت وقت اكون رايق و اجلس اسجل..
ولا ابيها تصير مثل يوم اسجل المره اللي راحت كنت مره مستعجل و سفلأت أبو الأغنية..
قريب ان شاء الله ابغني بالعربي.. أبغني هالأغنية:
http://www.ozq8.com/song-26102.ram
و يا نهار أبيض!
.
يا مال الغناة والله.. هالوردة هذي اللي تهاوشتي عليها مع اختك؟
قولي ايه!
هههههه نانو!
يا مال الغناة و الغنيمة..
هلا والله و غلا ttt998..
مساء الأنوار يا الغالي..
.
عسى سعادتك أبديه يا الغالي.. و ألف مبروك لخويك.. أتمنى له مستقبل مشرق بإذن الله..
صدقت بحكاية أصدقاء الطفولة.. هم أكثر ما يطري علي..
.
اللهم صل و سلم على رسولك.. نورت المكان يا الغالي..
اخوي مولي
عن جد انا لما قريت الموضوع تذكرت ناس عزيزين جدا على قلبي وانت تعرفهم…!
….! من جد الدنيا قرف
الموضوع هذا مرة حلو وعلى فكرة كل الاغاني هذي انا حافظها من قلبي لأنها لاشخاص عزيزين على
والمشكلة ان الاغنيتين ذولي كثير اللي اهدوني اياها من جد كانوا ناس محترمين و اصدقاء يفتخر الواحد فيهم
انا من جد اقولك يامولي انت مستحيل احد يقدر ينساك لأنك ماعمرك تعديت على احد و دايم انت مصدر السعاده فاكيد محد بيذكرك الا بالخير
بس ياخي لا تجيب مواضيع زي كذا ياخي تخلي الواحد يحزن ويقرف من الدنيا والعيشة
انا من جد ما ادري وش اكتب لانه موضوع مربك واكيد ان كل قروه كانوا مثلي صعب يعبرون عن اللي داخلهم
وانا عن نفسي وممكن حتى غيري هنا نتردد نتكلم لانه موضوع حساس لأن ممكن نحس بظلم او تكون منقهر ان شخص راح
من بين يديك
انا اهدي كل اللي هنا هالاغنيتين اللي لهم مكانه خاصه عندي
الشكلة لما قريت الموضوع من اول شي علطول قعدت اكل بسكوت شاي )-:
شكرا مولي على الموضوع اللي خلانا نفتح قلوبنا لبعض (-:
هلا و غلا و خالد..
أول شي.. روق يا حبني لك.. ما كان قصدي ترى اني افتح جروح أو أنكد على أحد.. هي أفكار و راحت يا الشين..
الله يسهل درب كل من راح.. هذي سنة الحياة.. و لاحظ اننا محظوظين كثير بالناس اللي حوالينا.. و محسودين عليهم.. و شي يغطي على شي ..
.
ثاني شي شف نانو تبيك.. بس انتبه لا تخربك!
.
ثالث شي.. ابد ابشر هذا آخر موضوع رومانسيكي ابشخمطه الى خمس سنين قدام!
يا شينك لا منك صرت حساس.. كتابتك تصير انواع الشخاميط.. نص حتسيك ما فهمته!
.
تعال خمن اويلاو.. ولا تكثر من بسكوت الشاي وجع!
مولي تعرف وش حسيت المسج هو
أغنية آنريكي
you will be always in my life even if I am not in your life
على الأقل بالنسبة لي
جازت لي مرة
يا عساك دوم مبسوط بس رومانسي مدري أخاف تضيق صدر خالد
اقول نانو
تكفين لاتقولين انك تبين تصيرين صديقتي ..!
اخاف باتسر تتشرهين علي 
..!
ياحبني لقلبك بس ..! (قلب ينبض)
الى الحين برابع جيم ماخليتي عنك حركات الشخمطه ع اليدين ..
(ورده)
مولي تراي كاتبه كلام كثير عن طيبتك بس اني يوم ارسلته مدري وين هج .. وربي
..
لو بنتكلم عن طيبة مولي واحنا ماعرفناه الا من خلال المدونه فقط ..!
انسان اعطانا طابع مميز لشخصيته .. انسان راقي ذو حس عالي يملك المواهب ,, يتمكن من القلب بطيبته وخفت روحه ..
مبدع خالصين منها
<< الله يمصلك نانو ماودي امدح اخاف يرز خشمه علينا
أومين ماعاد يكتب مدونات خونفشاريه 
مولي
بنتظار الاغنيه
<< يالليل ابو لمبه 
ايه هي الورده نفسها اللي تهاوشت عليها انا واختي ..! بس اني بعطيك كل مرة منها ورقه وحده ..!
…
برايفت خلود ..
ياخيي خل الدنيا على جنب تراها ماتسوي من يعطيها اكبر حجمها ولا تضيق صدرك ..
اضحك تكفى لين تطلع ضريساتك ان كانك تبي اقول صوتك احلى من مولي هع..!
(وردتون)
…
تشرفنا بمعرفتكم << بدأ التسطيل هع
جيت بس الظاهر متاخر
الله يديم السعادة والبسمه على محياك وشعاري الدائم اهم شيء الاخلاق ومافيه شيء بالدنيا يستاهل <<مسكت خط
مولي في هالمدونه خصوصا دخلتني جو الله اعلم به قعدت اتذكر كل اللي كان لهم بصمه بحياتي وللاسف لظروف هي اقوى منا افترقنا عنهم وحبيت ارجع واسالهم نفس سوالك هل هم يذكروني ؟؟
وكل انسان فيه ضعف حتى لو كابر كل منا فيه نقطة ضعف يحاول يخبئها عن الاخرين
والذكرى حلاوتها انها تجيك بدون ماتخطط اما لموقف اوصورة او فعل جسد امامك هذه الذكرى
مثلا مره من المرارير وحنا رايحين لرحله سياحيه داخليه مع الوالد للسويلم وعتيقه والمعيقليه مرينا على محل حلويات ومير اشوف ذاك البفك ((بفطك الامارات )) اذا كان احد يذكرهواتذكر صديقتي ساره ايام التمهيدي ودار براسي ميه سؤال وسؤال الحين وش صار عليها ..الخ
واخيرا اقول يعطيك العافيه على هالابداع
——————————————————————————–
هب الشمال وجابت الريح ذكرى
ياليت في بال الأحباب طاري
ياما على وصلك تحريت ذكرى
وياما على طاريك عطرت داري
كلامك مررررررررررره رائع , بس تدري يامولي وش الشي اللي من جد متعب انك تدري انهم مستحيل يتذكرونك , والاصعب انك تشوف هالناس حواليك وفي حياتك بس داخليا انتم مختلفين عن اول يعني ببساطه ماتتذكرون بعض ( ادري انك مافهمت شي بس انا فهمت)…
عموما شي اكيد لما الانسان يأثر في حياة شخص مستحيل ينساه حتى لو حاول…
هلا والله سويت هارت..
لقطتي المسج صح! ;)
.
و يا عساك دوم مبسوطه بعد..
اما خالد.. طلع رهيف الشين.. انا كنت متوقعه بيهوشني على هالموضوع لأنه دايم قوي!
نورتي المكان..
.
بي.اس. خـــــالـــد..
شف يا الشين الناس ضاقت صدورهم عليك!
انا عندي لك جملتين بس!
(وشي دي العمااارة).. و .. (يا ربي ما تطحش البائية)!!
روق وجع..!
هلا و غلا قطوه..
يا عزتي لك.. لا تكتبون شي.. لأني كذا أبضطر اكتب عنكم.. و انا متعيجز!
لازم اتكلم طيبة قلوبكم و خفة دمكم و روحكم الحلوه.. انا اعتبركم مكسب كبير لي من خلال هالمدونة..
.
الوردة أبحنطها أجل.. وردة تاريخية هذي!
و انتبهي لا تخربك نانو.. اليوم شخمطه على اليدين.. بكره شخمطه على الجدارن!
.
نورتي المكان..
هلا و غلا tofe..
لا ابد طال عمرك.. حنا في انتظار مشاركتك في أي وقت..
.
الله يعافيك يا الغالية..
أعجبني بلحيل كلامك.. عسى الله يرد لك كل غايب..
اما بفك الامارات.. اسمه اذكره زي الحلم.. يا عماااااري!
.
عساك انتي بعد مبسوطه دوم..
و شكرا على عالابيات الرائعه..
نورتي المكان..
أهليييين أروج!
اشتقنا وجع!
.
مممم.. اذا فيه ناس انا اعتقد جازما انهم مستحيل يذكروني.. فاحتمال كبير اني راح انساهم!
ودي اسهب في هالنقطه.. بس برضو متعيجز!
.
انتي اكيد فهمتي لو جزئيا من كنت اقصد في هالتدوينه ولا؟
و على قولتك.. حنا اصبحنا اشخاص مختلفين.. يمكن هذي هي سنة الحياة..
و المهم دائما.. ان الواحد يسوي مثل ما كتبت أنا فوووووق.. يساااار.. في زاوية الصفحة الأولى في المدونة..
.
نورتي المكان..
مرحبا … سعيده جدا بانضمامي لكم << قولولي منوره
نسيت اعلق عالموضوع :$ لكن المره الجايه… استتوقني كثير عندما قراته واعتقد ساقضي هذا اليوم الذي لا اعلم كيف (اصنفه ) في حياتي اقرا هذا الموضوع … تقبلو تحياتي
ضيقت صدري وبس
لآ تعليق .. !!
موضوع رائع منجد ..
بس بما إني كثيرة قرق و قلق .. فلازم أعلق طبعا .. سو هذا الي فوق معنى مجآزي ..!
المهمـ
أنا اكتشتفت بسنيني القليلة بهاذي الحياة … >> إنها تعتبر لسى ببدايتها ..
إن ممكن شخص ما شفته إلا مرة وحدة .. تقعد تفكر الحين فيه .. !
و إن أكثر الأشخاص الي قضيت معهم معظم أوقاتك .. ممكن بالنهاية تكتشف إنك ما تعرفهم ..
بس والله أتوقع إن الناس بيذكروك بالخير ,.
ع الأقل الأقل الي يدخلون هالمدونة
لأن منجد أنا أنصح فيك لأي أحد جايله حالة اكتئاب ..
والله يا إن مدونتك تفرح ما شاء الله .,,,
any way
التصميم حلوو مرررررررررررررة …
و الأغنية روعة روعة روعة ..
سلآم .,.!
النسيان نعمة !